ચૂંટણીપંચ અને BJP વચ્ચે મિલીભગત:રાહુલ ગાંધીએ 'પુરાવા' આપીને ચૂંટણીપંચને ઘેર્યું, મહારાષ્ટ્રનો ડેટા બતાવીને કહ્યું- અહીં 40 લાખ શંકાસ્પદ મતદારો

કોંગ્રેસના નેતા રાહુલ ગાંધીએ ગુરુવારે મતદારયાદીમાં થયેલી અનિયમિતતા પર 1 કલાક અને 11 મિનિટ માટે 22 પાનાંનું પ્રેઝન્ટેશન આપ્યું. સ્ક્રીન પર કર્ણાટકની મતદારયાદી બતાવતાં રાહુલે કહ્યું હતું કે બંને રાજ્યની મતદારયાદીમાં શંકાસ્પદ મતદારો છે. તેમણે કહ્યું હતું કે મહારાષ્ટ્રનાં પરિણામો જોયાં પછી અમારી શંકાની પુષ્ટિ થઈ કે ચૂંટણીમાં ચોરી થઈ છે. મશીન રીડેબલ મતદારયાદી પૂરી ન પાડીને, અમને ખાતરી થઈ કે ચૂંટણીપંચે ભાજપ સાથે મળીને મહારાષ્ટ્રની ચૂંટણીમાં ચોરી કરી છે. તેમણે કહ્યું હતું કે અમે અહીં મતચોરીનું એક મોડલ રજૂ કર્યું છે. મને લાગે છે કે આ મોડલનો ઉપયોગ દેશની ઘણી લોકસભા અને વિધાનસભાઓમાં કરવામાં આવ્યો હતો. કર્ણાટકમાં વિવિધ બૂથની મતદારયાદીમાં એક જ વ્યક્તિનું નામ હાજર છે. યાદીમાં ઘણી જગ્યાએ લોકોના ફોટા નથી. એ જ સમયે ઘણી જગ્યાએ નકલી સરનામાં લખવામાં આવ્યાં છે. શરૂઆત કર્ણાટકથી કરી: મહાદેવપુરા બેઠક પર 1 લાખ મતની ચોરી કર્ણાટકની મહાદેવપુરા વિધાનસભા બેઠકની મતદારયાદી સ્ક્રીન પર બતાવતાં રાહુલે કહ્યું હતું કે 6.5 લાખ મતોમાંથી 1 લાખ મત અહીં ચોરી થયા છે. કોંગ્રેસની તપાસમાં લગભગ એક લાખ ખોટાં સરનામાં, અનેક મતદારો અને એક જ સરનામા પર ડુપ્લિકેટ મતદારોનો ખુલાસો થયો. કર્ણાટકમાં અમે 16 બેઠક જીતી શક્યા હોત, પરંતુ અમે ફક્ત 9 બેઠક જીતી શક્યા. અમે આ સાત ગુમાવેલી બેઠકોમાંથી એકની તપાસ કરી, એ બેઠક બેંગલુરુ સેન્ટ્રલ હતી. આ બેઠક પર કોંગ્રેસને 6,26,208 મત મળ્યા. ભાજપને 6,58,915 મત મળ્યા. બંને પક્ષોના મતો વચ્ચેનો તફાવત ફક્ત 32,707 હતો. જ્યારે મહાદેવપુરા વિધાનસભા બેઠક પર મતદાન થયું ત્યારે બંને પક્ષો વચ્ચેના મતોનો તફાવત 1,14,046 હતો. રાહુલે કહ્યું- જો અમે આ રીતે જોઈએ તો 1 લાખથી વધુ મતો ચોરાઈ ગયા. આ મતચોરી પાંચ રીતે કરવામાં આવી હતી. પછી મહારાષ્ટ્ર અને હરિયાણાનો ઉલ્લેખ કર્યો, મતદારયાદીમાં 40 લાખ ફર્જી નામ કહ્યું - 6 મહિનામાં 7 ફૂટ ઊંચા કાગળો તપાસ્યા, પુરાવા એકઠા કર્યા રાહુલે જણાવ્યું કે અમે લાખો કાગળો જાતે તપાસ્યા પછી આ પુરાવા એકઠા કર્યા છે. જો આ કાગળોને બંડલમાં રાખવામાં આવે તો તે 7 ફૂટ ઊંચા હશે. પુરાવા એકઠા કરવામાં લગભગ 6 મહિના લાગ્યા. આવું એટલા માટે થયું કારણ કે ચૂંટણી પંચે અમને જાણી જોઈને મશીન વાંચી ન શકાય તેવા કાગળો પૂરા પાડ્યા હતા. જેથી તેમને મશીન દ્વારા સ્કેન ન કરી શકાય. ચૂંટણી પંચને 2 સવાલ પૂછ્યા 1. ઇલેક્ટ્રોનિક ડેટા કેમ નથી આપતું: ચૂંટણી પંચ ઇલેક્ટ્રોનિક ડેટા કેમ આપતું નથી? અમે વારંવાર કમિશન પાસે ડેટા માંગ્યો પણ અમને તે આપવામાં આવ્યો નહીં. ચૂંટણી પંચે અમને જવાબ આપવાનો પણ ઇનકાર કર્યો. 2. નકલી મતદાન થઈ રહ્યું છે: દેશમાં નકલી મતદાન થઈ રહ્યું છે. આ ચોરી પકડવામાં અમને ઘણો સમય લાગ્યો. આ મતદાર યાદીમાં ઘણા લોકોના પિતાના નામ આગળ કંઈક લખેલું છે. મતદાર યાદીમાં ઘણા ઘરોના સરનામાં શૂન્ય છે. ડુપ્લિકેટ મતદારોની સંખ્યા ખૂબ વધારે છે. ત્રણ વાર મતદાન કરનારા 11 હજાર શંકાસ્પદ લોકો છે. આ લોકો ક્યાંથી આવી રહ્યા છે? એક જ સરનામે 46 મતદારો છે. રાહુલે પ્રેઝન્ટેશનમાં બતાવ્યું કે 5 રીતે મતોની ચોરી કેવી રીતે થઈ 1. ડુપ્લિકેટ મતદારો: 11,965: રાહુલનો દાવો છે કે ઘણી જગ્યાએ મતદારયાદીમાં એક જ વ્યક્તિ દેખાઈ હતી. દરેક વખતે તેનો બૂથ નંબર અલગ હતો. ત્રણ વાર મતદાન કરનારા 11,000 શંકાસ્પદો છે. આ લોકો ક્યાંથી આવી રહ્યા છે? 2. ખોટાં સરનામાં: 40,009 મતદારો: રાહુલનો દાવો - બેંગલુરુ સેન્ટ્રલમાં 40 હજારથી વધુ મતદારોના સરનામાં ખોટા હોવાનું જાણવા મળ્યું. તે સરનામાંઓ પર કોઈ રહેતું ન હતું, તો પછી કોણે મતદાન કર્યું? એક જ સરનામાં પર 46 મતદારો છે. 3. એક સરનામા પર અનેક મતદારો: રાહુલનો ત્રીજો દાવો - એક સરનામે ઘણા મતદારો મળ્યા. બૂથ નંબર 470 પર લિસ્ટેડ 35 નંબરના ઘર પર 80 મતદાર મળ્યા. એવી જ રીતે બીજા ઘરમાં 46 મતદારની યાદી બનાવવામાં આવી. 4. અમાન્ય ફોટો: રાહુલનો દાવો- 4132 મતદાર હતા, જેમનો મતદાર ઓળખપત્રમાંનો ફોટો અમાન્ય હતો. કેટલાક ફોટા એટલા નાના હતા કે તેમને ઓળખવા મુશ્કેલ હતા. તો પછી તેમણે મતદાન કેવી રીતે કર્યું. 5. ફોર્મ- 6થી છેતરપિંડી: 70 વર્ષીય શકુન રાનીએ મતદાર ઓળખપત્ર મેળવવા માટે મહિનામાં બેવાર ફોર્મ 6 ભર્યું. એકવાર તેમનો ફોટો દૂરથી લેવામાં આવ્યો. બીજી વાર તેમણે ઝૂમ કરીને ફોટો અપલોડ કર્યો.​​​​​​​ ફોર્મ 6 એવું ફોર્મ છે, જેના દ્વારા કોઈપણ નવો મતદાર, એટલે કે જેણે પહેલાં ક્યારેય મતદારકાર્ડ બનાવ્યું નથી, તે મતદારયાદીમાં પોતાનું નામ ઉમેરવા માટે અરજી કરી શકે છે.​​​​​​​ ચૂંટણીપંચ પર રાહુલના આરોપો, છેલ્લા 3 કેસ... 2 ઓગસ્ટ: બંધારણનું રક્ષણ કરનારી સંસ્થા ખતમ કરી બંધારણનું રક્ષણ કરતી સંસ્થાનો ખતમ કરવામાં આવી છે અને તેના પર કબજો કરવામાં આવ્યો છે. અમારી પાસે એવા પુરાવા છે, જે આખા દેશને બતાવશે કે ચૂંટણીપંચ જેવી સંસ્થા અસ્તિત્વમાં નથી. તે ગુમ થઈ ગઈ છે. ચૂંટણીપંચ જેવી સંસ્થા યોગ્ય રીતે કાર્ય કરતી નથી. તમને જાણીને આશ્ચર્ય થશે કે ચૂંટણીપંચ દ્વારા પૂરા પાડવામાં આવેલા દસ્તાવેજો સ્કેન અથવા નકલ કરી શકાતા નથી. ચૂંટણીપંચ મતદારયાદી પર સ્કેન અને નકલ સુરક્ષા કેમ લાગુ કરે છે? 1 ઓગસ્ટ 2025: રાહુલે કહ્યું- મારી પાસે ચોરીના 100% પુરાવા છે રાહુલે વધુમાં કહ્યું હતું કે હું આ વાત હળવાશથી નથી કહી રહ્યો, પરંતુ સો ટકા પુરાવા સાથે કહી રહ્યો છું. અમે એને રિલીઝ કરતાંની સાથે જ આખા દેશને ખબર પડી જશે કે ચૂંટણીપંચ ભાજપ માટે મતચોરી કરવાનું કામ કરી રહ્યું છે. મધ્યપ્રદેશની ચૂંટણી, લોકસભાની ચૂંટણીમાં અમને શંકા હતી, મહારાષ્ટ્રની ચૂંટણી દરમિયાન અમારી શંકાઓ વધુ વધી ગઈ. 24 જુલાઈ 2025: તમને લાગે છે કે તમે બચી જશો, આ તમારી ભૂલ છે કર્ણાટકની એક બેઠક પર ચૂંટણીપંચે છેતરપિંડી કરી છે. અમારી પાસે આના 100% પુરાવા છે. એક મતવિસ્તારમાં 50, 60 અને 65 વર્ષની વયના હજારો નવા મતદારોને યાદીમાં ઉમેરવામાં આવ્યા છે અને 18 વર્ષથી વધુ ઉંમરના મતદારોને યાદીમાંથી કાઢી નાખવામાં આવ્યા છે. એક બેઠકની તપાસ કરતી વખતે અમને આ વિસંગતતા મળી. મને ખાતરી છે કે દરેક બેઠક પર આ જ નાટક ચાલી રહ્યું છે. હું ચૂંટણીપંચને સંદેશ આપવા માગું છું. જો તમને લાગે છે કે તમે આનાથી બચી જશો તો એ તમારી ભૂલ છે. ચૂંટણીપંચના 5 જવાબ ECIએ લખ્યું હતું- જો કોંગ્રેસ વાંધો ઉઠાવે તો એ કોર્ટમાં જઈ શકે છે 2 ઓગસ્ટના રોજ ચૂંટણીપંચે 24 જૂને રાહુલને મોકલવામાં આવેલ પત્ર જાહેર કર્યો. પત્રમાં કહેવામાં આવ્યું છે કે કોંગ્રેસે અગાઉ નવેમ્બર 2024ની ચૂંટણી પછી આવા જ આરોપો લગાવ્યા હતા, જેનો વિગતવાર જવાબ 24 ડિસેમ્બર, 2024ના રોજ આપવામાં આવ્યો હતો. પત્રમાં જણાવાયું છે કે ચૂંટણીઓ સંપૂર્ણ પારદર્શિતા સાથે, કાયદા અનુસાર અને હજારો અધિકારીઓની દેખરેખ હેઠળ યોજાઈ હતી. પંચે એમ પણ કહ્યું હતું કે જો કોંગ્રેસને કોઈ કાનૂની વાંધો હોય, તો તે કોર્ટમાં ચૂંટણી અરજી દાખલ કરી શકે છે. ચૂંટણીપંચે લખ્યું, છતાં જો રાહુલ ગાંધીને બીજી કોઈ ફરિયાદ હોય તો તેઓ કમિશનને લખી શકે છે અથવા રૂબરૂ મળી શકે છે. કમિશને વાટાઘાટો માટે તારીખ અને સમય નક્કી કરવાનું પણ સૂચન કર્યું છે. બિહાર વોટર વેરિફિકેશન - રાહુલ સહિત સમગ્ર વિપક્ષના પ્રહાર રાહુલ સહિત સમગ્ર વિપક્ષ બિહાર વોટર વેરિફિકેશન અંગે ચૂંટણીપંચની ટીકા કરી રહ્યું છે. વિપક્ષ સંસદની બહાર અને અંદર વિરોધ કરી રહ્યું છે. મતદારોનો નવો ડેટા 1 ઓગસ્ટના રોજ જાહેર કરવામાં આવ્યો હતો. બિહારમાં ચૂંટણીપંચના મતદારયાદી સુધારણાના પ્રથમ તબક્કા મુજબ, કુલ મતદારોની સંખ્યા ઘટીને 7.24 કરોડ થઈ ગઈ છે, જ્યારે અગાઉ આ આંકડો 7.89 કરોડ હતો, એટલે કે લગભગ 65 લાખ મતદારોને યાદીમાંથી કાઢી નાખવામાં આવ્યા છે. મતદારયાદીમાંથી દૂર કરાયેલાં નામોમાં એવા લોકોનો સમાવેશ થાય છે જેઓ હવે આ દુનિયામાં નથી. આ ઉપરાંત જેઓ કાયમી રીતે બીજી જગ્યાએ સ્થળાંતરિત થયા છે અથવા જેમનાં નામ બે વાર નોંધાયેલાં છે. માહિતી અનુસાર, 22 લાખ મતદારો મૃત્યુ પામ્યા છે, 36 લાખ મતદારો અન્ય જગ્યાએ સ્થળાંતરિત થયા હોવાનું જાણવા મળ્યું છે અને 7 લાખ લોકો નવી જગ્યાના કાયમી રહેવાસી બન્યા છે. 24 જૂન 2025થી આ વિશેષ અભિયાન શરૂ થયું હતું SIR 24 જૂન 2025ના રોજ શરૂ કરવામાં આવ્યું હતું. એનો મુખ્ય ઉદ્દેશ નકલી, ડુપ્લિકેટ અને ટ્રાન્સફર થયેલા મતદારોને યાદીમાંથી દૂર કરવાનો અને નવા પાત્ર મતદારો ઉમેરવાનો હતો. આ કાર્ય હેઠળ, 7.24 કરોડ મતદારો પાસેથી ફોર્મ લેવામાં આવ્યાં હતાં. પ્રથમ તબક્કો 25 જુલાઈ 2025 સુધીમાં પૂર્ણ થયો હતો, જેમાં 99.8% કવરેજ થયું હતું.