कृषी विद्यापीठातील रब्बी ज्वारीचे दोन वाण राष्ट्रीय स्तरावर प्रसारित

राहुरी महात्मा फुले कृषि विद्यापीठातील रब्बी ज्वारीचे एस. पी. व्ही.२९१९ व एस. पी. व्ही.२७५१ हे दोन वाण राष्ट्रीय स्तरावर प्रसारित करण्यात आले. रब्बी ज्वारीवर भारतीय कृषी अनुसंधान परिषद,भारतीय श्री अन्न संशोधन संस्था,हैद्राबाद येथे राष्ट्रीय स्तरावरची ज्वारीची वार्षिक आढावा बैठक झाली. या संमेलनाच्या अध्यक्षस्थानी कृषि शास्त्र विभागाचे उपमहासंचालक डॉ. डी. के. हे होते. यावेळी महात्मा फुले कृषि विद्यापीठाने विकसित केलेले एस. पी. व्ही.२९१९ व एस. पी. व्ही.२७५१ हे दोन वाण राष्ट्रीय स्तरावर प्रसारीत करण्यात आले. कृषि विद्यापीठातील अखिल भारतीय समन्वित ज्वारी सुधार प्रकल्प हे राज्यातील रब्बी हंगामामधील ज्वारी संशोधनाचे प्रमुख केंद्र आहे. येथे ज्वारी पिकाचे संशोधन करुन त्यामधून जमीनीच्या प्रकारानुसार हलक्या, मध्यम व भारी जमीनीसाठी ज्वारीच्या उपपदार्थानुसार व कडबा गुणवत्ता वाढविण्याच्या दृष्टिने नविन वाण विकसित केले जातात.ज्वारी सुधार प्रकल्प येथील प्रक्षेत्रावर रब्बी हंगामामध्ये कृषि अनुसंधान परिषद नवी दिल्ली, भारतीय श्रीअन्न संशोधन संस्था हैद्राबाद यांचे मार्गदर्शनाखाली ज्वारी पीकाचे विविध प्रयोग घेतले जातात. एस.पी.व्ही.२९१९ हा वाण भारी जमीनीसाठी महाराष्ट्र, गुजरात व कर्नाटक या तीन राज्यांमध्ये जिरायत लागवडीसाठी प्रसारित केला. या वाणाचे हेक्टरी उत्पादन २९.२६ क्विंटल प्रति हेक्टरी आणि कडब्याचे उत्पादन ८०.५८ क्विंटल प्रति हेक्टरी इतके आहे. श्रीअन्न संशोधन संस्था हैद्राबाद येथील संचालक डॉ. तारा सत्यवती व प्रकल्प निर्देशक डॉ. आर. मधुसुदन संशोधन संचालक डॉ. विठ्ठल शिर्के यांचेही या वाणांच्या निर्मितीमध्ये मार्गदर्शन लाभले.