ઓવલ ટેસ્ટને યાદગાર બનાવનારી 12 મોમેન્ટ્સ:ગેમની 294મી ઓવર સુધી કોણ જીતશે એ ખબર નહોતી, વોક્સ તૂટેલા ખભા સાથે રમવા આવ્યો

ઓવલ ટેસ્ટમાં ભારતીય ફાસ્ટ બોલર મોહમ્મદ સિરાજે ગસ એટકિન્સનને જે બોલથી બોલ્ડ કર્યો હતો અને ભારતને જીત અપાવી હતી તે આ મેચની 295મી ઓવરનો પહેલો બોલ હતો. આ મેચ હંમેશા માટે એટલી રોમાંચક અને યાદગાર બની ગઈ કારણ કે આ બોલ પહેલા રમાયેલી 294 ઓવરમાં મેચનું પરિણામ કોના પક્ષમાં જશે તે નક્કી નહોતું. ભારત અને ઇંગ્લેન્ડ મેચ જીતી શક્યા હોત. એ પણ શક્ય હતું કે આ ક્રિકેટ ઇતિહાસમાં ફક્ત ત્રીજી ટાઇ બની શકે. મેચમાં 12 મોમેન્ટ્સ એવી હતી જેણે મેચનું સંતુલન ભારત અને ઇંગ્લેન્ડના પક્ષમાં ફેરવ્યું. ચાલો આપણે આ બધી 12 નાટકીય ઘટનાઓ એક પછી એક જોઈએ. ઓવલ ટેસ્ટના 12 ટર્નિંગ પોઈન્ટ... 1. ભારત ટૉસ હાર્યું, વિકેટ જલદી પડી ગઈ; કરુણ નાયરની લડાયક ફિફ્ટી ગુરુવારે, લંડનના ઓવલ ખાતે ભારતની શરૂઆત ખરાબ રહી હતી. ટીમે સિરીઝમાં સતત પાંચમો ટૉસ ગુમાવ્યો અને ઈન્ટરનેશનલ ક્રિકેટમાં તેનો સતત 15મો ટૉસ. ભારતને ઓવલની સ્વિંગિંગ પીચ પર બેટિંગ કરવી પડી, અને ટીમે ફક્ત 123 રનમાં 5 વિકેટ ગુમાવી દીધી. પાંચમા ક્રમે બેટિંગ કરવા આવેલા કરુણ નાયરે પછી ઇનિંગની કમાન સંભાળી અને ટીમને 200 રનના આંકડાને પાર પહોંચાડી દીધી. જોકે, તે આઉટ થતાં જ ટીમ 224 રનમાં ઓલઆઉટ થઈ ગઈ. આ સમગ્ર એન્ડરસન-તેંડુલકર ટ્રોફીમાં પ્રથમ ઇનિંગમાં કોઈપણ ટીમનો સૌથી ઓછો સ્કોર હતો. આ પહેલા 358 રન સૌથી ઓછો સ્કોર હતો. 2. ડકેટ-ક્રોલીની ઝડપી ભાગીદારી, એવું લાગતું હતું કે ભારત મેચમાં ઘણું પાછળ રહેશે પ્રથમ ઇનિંગમાં ભારતને ઓછા સ્કોર સુધી મર્યાદિત રાખ્યા બાદ, ઇંગ્લેન્ડે ઝડપી શરૂઆત કરી. બેન ડકેટ અને ઝેક ક્રોલીએ 13મી ઓવરમાં જ ટીમનો સ્કોર 90 રનની પાર પહોંચાડ્યો. ડકેટની વિકેટ પડ્યા પછી પણ, ક્રોલીએ ઝડપી બેટિંગ કરી અને ફિફ્ટી ફટકારી. 128 રન સુધી ઇંગ્લેન્ડે ફક્ત 1 વિકેટ ગુમાવી દીધી હતી, અહીં એવું લાગતું હતું કે ઇંગ્લેન્ડ મેચ પર સંપૂર્ણ પ્રભુત્વ મેળવશે. 3. પેસર્સે ઈંગ્લેન્ડને મોટી લીડ લેતા અટકાવ્યું પ્રસિદ્ધ ક્રિષ્નાએ પહેલી ઇનિંગમાં ક્રોલીને કેચ કરાવ્યો અને ભારતને સફળતા અપાવી. ઇંગ્લેન્ડે 215 રન સુધી ફક્ત 5 વિકેટ ગુમાવી દીધી હતી. હેરી બ્રુક એક છેડેથી ઝડપી બેટિંગ કરી રહ્યો હતો. અહીં મોહમ્મદ સિરાજ અને પ્રસિદ્ધે ટીમનું પુનરાગમન કર્યું. બંનેએ સાથે મળીને આગામી 33 રનમાં 5 વિકેટ લીધી અને ઇંગ્લેન્ડને 247 રનમાં ઓલઆઉટ કરી દીધું. સિરાજ-પ્રસિદ્ધની જોરદાર બોલિંગને કારણે ઇંગ્લેન્ડ ફક્ત 23 રનની લીડ મેળવી શક્યું. 4. જયસ્વાલની સેન્ચુરી અને નાઇટ વોચમેન આકાશદીપની ફિફ્ટી બીજી ઇનિંગમાં ભારતે સાવધાનીપૂર્વક શરૂઆત કરી, પરંતુ મેચના બીજા દિવસે કેએલ રાહુલ અને સાઈ સુદર્શન આઉટ થઈ ગયા. ટીમે 70 રન પર 2 વિકેટ ગુમાવી દીધી, અહીં બોલર આકાશદીપ નાઈટ વોચમેન તરીકે બેટિંગ કરવા આવ્યો. મેચના ત્રીજા દિવસે, પીચ બેટિંગ માટે મદદરૂપ બની. ત્રીજા દિવસે, યશસ્વીએ સાવધાનીપૂર્વક બેટિંગ કરી, આકાશદીપ પણ સ્થિર રહ્યો. તેણે મુક્તપણે શોટ રમ્યા અને તેની કારકિર્દીની પહેલી અડધી સદી ફટકારી. યશસ્વીએ પણ તેની સાથે ફિફ્ટી ફટકારી. બંનેએ ટીમને 150 રનની પાર પહોંચાડી અને 107 રનની ભાગીદારી કરી. 5. બીજી ઇનિંગમાં ભારતનો મિની ધબડકો પ્રથમ ઇનિંગમાં ઇંગ્લેન્ડને મોટી લીડ મેળવવાથી રોક્યા બાદ, ભારતે તેની બીજી ઇનિંગમાં બે વિકેટે 177 રન બનાવ્યા. નાઇટવોચમેન આકાશદીપે અડધી સદી ફટકારી હતી અને ઓપનર યશસ્વી જયસ્વાલ સદી તરફ આગળ વધી રહ્યો હતો. અહીં આકાશદીપે 66 રનના સ્કોર પર જેમી ઓવરટન સામે પોતાની વિકેટ ગુમાવી દીધી. આગામી 12 ઓવરમાં ભારતે વધુ ત્રણ વિકેટ ગુમાવી દીધી અને સ્કોર પાંચ વિકેટે 229 રન થઈ ગયો. ત્યારબાદ ભારતની લીડ ફક્ત 206 રનની રહી. ટીમ ઈન્ડિયાના આ મિની ધબડકાથી ઈંગ્લેન્ડ મેચમાં વાપસી કરી શક્યું. 6. જાડેજા-સુંદરે ભારતની લીડ વધારી યશસ્વી જયસ્વાલે સદી ફટકારી હતી, પરંતુ જ્યારે તે 118 રન બનાવીને આઉટ થયો ત્યારે ભારતની લીડ હજુ પણ ફક્ત 250 રનની હતી. પીચ બેટિંગ માટે સારી થઈ રહી હતી અને ઇંગ્લિશ ટીમ માટે લગભગ 300 રનનો ટાર્ગેટ ખૂબ સરળ હોત. ધ્રુવ જુરેલ સારું રમી રહ્યો હતો, પરંતુ તે પણ 34 રન બનાવીને આઉટ થયો હતો. 6 વિકેટ પછી, રવીન્દ્ર જાડેજા અને પછી વોશિંગ્ટન સુંદરે અડધી સદી ફટકારીને ભારતની લીડને મેચમાં મજબૂત સ્થિતિમાં પહોંચાડી દીધી. જાડેજાએ 77 બોલમાં 5 ચોગ્ગાની મદદથી 53 રન બનાવ્યા. જ્યારે, સુંદરે 46 બોલમાં 4 ચોગ્ગા અને એટલા જ છગ્ગાની મદદથી 53 રન બનાવ્યા. સુંદરે પ્રસિદ્ધ સાથે છેલ્લી વિકેટ માટે 39 રન ઉમેર્યા. આ રન આખરે ભારત માટે નિર્ણાયક સાબિત થયા. 7. રૂટ અને બ્રુકની ભાગીદારીએ ઇંગ્લેન્ડને પ્રભુત્વ આપવામાં મદદ કરી ઇંગ્લેન્ડે ત્રીજા દિવસે જ પોતાનો બીજો દાવ શરૂ કર્યો. ટીમે 50 રન ઝડપથી બનાવ્યા, પરંતુ દિવસની છેલ્લી ઓવરમાં ઝેક ક્રોલી આઉટ થઈ ગયો. ચોથા દિવસે, ટીમે 106 રનમાં 3 વિકેટ ગુમાવી દીધી. અહીં જો રૂટ અને હેરી બ્રુકે ઇનિંગ સંભાળી. સાથે મળીને, ટીમે 300 રનનો આંકડો પાર કર્યો. બ્રુક અને રૂટ બંનેએ સદી ફટકારી અને ભારતને લગભગ મેચમાંથી બહાર કરી દીધું. 8. બ્રુકનો નબળો શોટ અને મેચ ભારત તરફ વળી ગઈ ઇંગ્લેન્ડે 300 રન સુધી ફક્ત 3 વિકેટ ગુમાવી દીધી હતી. બ્રુકે આકાશદીપની એક ઓવરમાં 2 બાઉન્ડરી ફટકારી હતી, તેમ છતાં તે મોટો શોટ રમવા ગયો અને કેચ આઉટ થયો. આ વિકેટ સાથે ભારતે મેચમાં વાપસી કરવાનો પ્રયાસ કર્યો. જોકે, રૂટ અને જેકબ બેથેલે આગામી 7 ઓવર સુધી ટીમની વિકેટ પડવા દીધી નહીં. 71મી ઓવરમાં, જેકબ બેથેલ ફરીથી મોટો શોટ રમવા માટે આગળ વધ્યો અને બોલ્ડ થયો. અહીંથી ગતિ ભારતના પક્ષમાં ગઈ. 2 ઓવર પછી, જો રૂટ, જેણે પહેલાથી જ સદી ફટકારી હતી, તે પણ કૉટ બિહાઇન્ડ આઉટ થયો. ટીમે 337 રન પર 6 વિકેટ ગુમાવી દીધી અને ગતિ સંપૂર્ણપણે ભારતના પક્ષમાં ગઈ. 9. વરસાદના કારણે મેચ ચાર દિવસમાં સમાપ્ત થઈ શકી નહીં આ સિરીઝની પહેલી ચાર મેચ પાંચ દિવસ ચાલી હતી. આ મેચ ફક્ત ચાર દિવસમાં જ પૂરી થવાની હતી. એક દિવસમાં 90 ઓવર હોય છે પરંતુ ચોથા દિવસે ફક્ત 62.3 ઓવર જ રમી શકાઈ હતી અને આ ટેસ્ટ મેચ પણ પાંચમા દિવસે પહોંચી ગઈ. વરસાદ અને ઓછા પ્રકાશને કારણે, ચોથા દિવસે રમત નિર્ધારિત સમય કરતાં એક કલાક પહેલા રોકવી પડી. 10. ઈંગ્લેન્ડને 35 રનની જરૂર હતી અને હેલા બે બોલમાં બે ચોગ્ગા ફટકાર્યા પાંચમા દિવસની શરૂઆતમાં, ઇંગ્લેન્ડને જીતવા માટે 35 રનની જરૂર હતી અને ભારતને જીતવા માટે 4 વિકેટની જરૂર હતી. દિવસની પહેલી ઓવર ફેંકવા માટે પ્રસિદ્ધ આવ્યો અને ઓવરટને તેના પહેલા બે બોલ પર બે ચોગ્ગા ફટકાર્યા. હવે ઇંગ્લેન્ડને ફક્ત 27 રનની જરૂર હતી. 11. મિયાંનો જાદુ ફરી કામ કરી ગયો અને ભારત જીતની નજીક આવી ગયું મોહમ્મદ સિરાજે આગામી ઓવરમાં પ્રસિદ્ધ બોલ પર લાગેલા બે ચોગ્ગાની ભરપાઈ કરી. દિવસની પોતાની પહેલી ઓવરના ત્રીજા બોલ પર, તેણે ઇંગ્લેન્ડના છેલ્લા સ્પેશિયાલિસ્ટ બેટર જેમી સ્મિથને વિકેટ પાછળ ધ્રુવ જુરેલના હાથે કેચ કરાવ્યો. ઇંગ્લેન્ડ આ ફટકામાંથી બહાર નીકળે તે પહેલાં, સિરાજે તેની આગામી ઓવરમાં ઓવરટનને LBW આઉટ કરાવ્યો. અમ્પાયર ધર્મસેનાએ તેને આઉટ આપ્યો ત્યારે ઓવરટને DRS લીધો. પરંતુ રિવ્યૂ કામ ન આવ્યો અને તે અમ્પાયરના કોલ પર આઉટ થયો. થોડા સમય પછી, પ્રસિદ્ધે જોશ ટંગ (0)ને આઉટ કરીને ભારતને જીતના ઉંબરે પહોંચાડ્યું. 12. ક્રિસ વોક્સ એક હાથે બેટિંગ કરવા આવ્યો ઈંગ્લેન્ડના ફાસ્ટ બોલર ક્રિસ વોક્સનો ભારતના પ્રથમ દાવમાં ફિલ્ડિંગ કરતી વખતે ખભામાં ઈજા થઈ હતી. ઈંગ્લેન્ડ ક્રિકેટ બોર્ડે પણ જાહેરાત કરી હતી કે વોક્સ હવે મેચમાં ભાગ લેશે નહીં. પરંતુ જ્યારે ઈંગ્લેન્ડની નવમી વિકેટ પડી ગઈ અને ટીમ જીતથી માત્ર 17 રન દૂર હતી, ત્યારે વોક્સે પોતાનો તૂટેલો હાથ સ્વેટરમાં નાખ્યો અને એક હાથે બેટિંગ કરવા ગયો. વોક્સ આગામી 13 બોલ સુધી ક્રિઝ પર રહ્યો. એટકિન્સન તેને સ્ટ્રાઈકથી બચાવી રહ્યો હતો અને બધા બોલ પોતે રમીને મોટા શોટ મારવાનો પ્રયાસ કરવા લાગ્યો. તેણે સિરાજની બોલ પર સિક્સર પણ ફટકારી અને સતત બે ઓવરમાં છેલ્લા બોલ પર રન લઈને વોક્સને સ્ટ્રાઈકથી દૂર રાખ્યો. હવે ઈંગ્લેન્ડને જીતવા માટે ફક્ત 7 રનની જરૂર હતી. ત્યારબાદ મોહમ્મદ સિરાજે સમગ્ર ટેસ્ટ મેચની કુલ 295મી ઓવર અને ઇંગ્લેન્ડની બીજી ઇનિંગની 86મી ઓવર ફેંકી. તેણે એટકિનસનને બોલ્ડ કરીને ભારતને 6 રનથી ઐતિહાસિક જીત અપાવી. ટેસ્ટ ક્રિકેટમાં રનના સંદર્ભમાં આ ભારતનો સૌથી ઓછા માર્જિનથી વિજય છે. આ સાથે, ભારતની યુવા ટીમે ઈંગ્લેન્ડમાં સિરીઝ 2-2થી બરાબર કરી.