24 કલાકમાં રાજયમાં કોરોનાના સૌથી વધુ 64 કેસ નોંધાયા:દેશમાં 4866 કેસ, 47ના મોત, આજે કેન્દ્રની મોકડ્રીલ; ચોથી લહેર માટે હોસ્પિટલોની તૈયારીઓનું નિરીક્ષણ કરાશે

દેશમાં કોરોનાના દર્દીઓની સંખ્યા સતત વધી રહી છે. બુધવારે દિલ્હી અને ગુજરાતમાં સૌથી વધુ 64-64 કેસ નોંધાયા હતા. ત્યારબાદ ઉત્તરપ્રદેશમાં 63 અને પશ્ચિમ બંગાળમાં 60 દર્દીઓ મળી આવ્યા હતા. આ રીતે, દેશમાં એક્ટિવ કેસની સંખ્યા 4866 અને મૃત્યુઆંક 47 પર પહોંચી ગયો છે. આ દરમિયાન, કેન્દ્ર સરકાર આજે દેશભરમાં મોક ડ્રીલ કરશે. કેન્દ્રીય આરોગ્ય મંત્રાલય રાજ્યોની હોસ્પિટલોમાં કોરોના સંબંધિત તૈયારીઓનું નિરીક્ષણ કરશે. આરોગ્ય સેવા મહાનિર્દેશાલયના મહાનિર્દેશક ડૉ. સુનિતા શર્માએ ઘણી બેઠકો પછી આ મોક ડ્રીલ કરવાનો નિર્ણય લીધો છે. મોક ડ્રીલમાં, દેશની મુખ્ય હોસ્પિટલોમાં ઓક્સિજન સપ્લાય, આવશ્યક દવાઓની સ્થિતિ અને વેન્ટિલેટરની વ્યવસ્થાનું પરીક્ષણ કરવામાં આવશે. આ પછી, કોરોનાની ચોથી લહેરની સ્થિતિમાં હોસ્પિટલોની તૈયારી માટે રેટિંગ આપવામાં આવશે. અગાઉ, 2 જૂનના રોજ પ્રારંભિક મોક ડ્રીલ હાથ ધરવામાં આવી હતી. આમાં, હોસ્પિટલોને આરોગ્યસંભાળ માળખાની ઉપલબ્ધતા માટે રેટિંગ આપવામાં આવ્યું હતું. આમાં, લિક્વિડ મેડિકલ ઓક્સિજન ટેન્ક, પ્રેશર સ્વિંગ એડજોર્પશન પ્લાન્ટ અને મેડિકલ ગેસ પાઇપલાઇન સિસ્ટમ્સ પર ધ્યાન કેન્દ્રિત કરવામાં આવ્યું હતું. કેરળમાં શરદી, ખાંસી અને તાવ હોય તે લોકો માટે કોવિડ ટેસ્ટ ફરજિયાત દેશમાં કોરોનાના સૌથી વધુ એક્ટિવ કેસ કેરળ રાજ્યમાં છે. આને ધ્યાનમાં રાખીને, રાજ્ય સરકારે બુધવારે હોસ્પિટલો અને આરોગ્ય કર્મચારીઓ માટે ગાઈડલાઈન જારી કરી છે. આ અંતર્ગત, રાજ્યની તમામ હોસ્પિટલોમાં મોક ડ્રીલ કરવામાં આવશે. આ દરમિયાન, કોરોનાથી બચવા માટેની પદ્ધતિઓ જણાવવામાં આવશે. ઉપરાંત, શરદી, ખાંસી અને તાવ જેવા લક્ષણો ધરાવતા દર્દીઓ માટે કોવિડ ટેસ્ટ ફરજિયાત કરવામાં આવ્યો છે. માસ્ક પહેર્યા પછી જ હોસ્પિટલમાં પ્રવેશની મંજૂરી આપવામાં આવશે. કેન્દ્ર સરકારે કહ્યું- કોરોનાનો સામનો કરવા માટે તૈયારીઓ પૂર્ણ કેન્દ્રીય આરોગ્ય અને આયુષ રાજ્યમંત્રી પ્રતાપરાવ જાધવે કહ્યું- આરોગ્ય વિભાગ અને આયુષ મંત્રાલય સંપૂર્ણપણે સતર્ક છે. અમે બધા રાજ્યોમાં પરિસ્થિતિ પર નજર રાખી રહ્યા છીએ. અમે સંબંધિત સચિવો અને મંત્રીઓ સાથે વાત કરી છે. તેમણે વધુમાં જણાવ્યું હતું કે, અગાઉના કોવિડ લહેરો દરમિયાન બનાવવામાં આવેલા ઓક્સિજન પ્લાન્ટ, ICU બેડ વગેરે જેવી બાબતોની સમીક્ષા કરવામાં આવી છે. કોઈપણ પરિસ્થિતિનો સામનો કરવા માટે તૈયારીઓ ચાલી રહી છે. હાઈકોર્ટે કહ્યું- કોવિડની આગામી મહામારી હજુ ખતમ થઈ નથી દિલ્હી હાઈકોર્ટે સોમવારે કહ્યું કે કોવિડની આગામી મહામારી હજુ ખતમ થઈ નથી, પરંતુ તે હજુ પણ એક્ટિવ છે. કોર્ટે કેન્દ્ર સરકાર પાસેથી સેમ્પલ કલેક્શન સેન્ટર અને ટ્રાન્સપોર્ટ પોલિસી અંગે કરવામાં આવેલી તૈયારીઓ વિશે માહિતી માંગી છે. કોર્ટે કહ્યું કે જો 30 મે, 2023ના રોજ યોજાયેલી બેઠક પછી લેવામાં આવેલા નિર્ણયોને લાગુ કરવામાં કોઈ કચાશ હોય, તો તે એક ગંભીર બાબત છે. જસ્ટિસ ગિરીશ કથપાલિયાએ કહ્યું કે એવું માની લેવું જોઈએ કે જરૂરી પગલાં અને પ્રોટોકોલ નક્કી કરવામાં આવ્યા હશે, પરંતુ સંબંધિત અધિકારીઓએ તેને રેકોર્ડ પર લાવવું જોઈએ. 11 રાજ્યોમાં અત્યાર સુધીમાં 47 લોકોના મોત થયા છે મિઝોરમમાં 7 મહિના પછી કોવિડનો પહેલો કેસ નોંધાયો 30 મેના રોજ મિઝોરમમાં બે લોકોનો કોવિડ-19 ટેસ્ટ પોઝિટિવ આવ્યો છે. આરોગ્ય વિભાગના અધિકારીઓએ જણાવ્યું હતું કે રાજ્યમાં આવો છેલ્લો કેસ નોંધાયાના 7 મહિના પછી કોવિડના કેસ મળી આવ્યા હતા. મિઝોરમમાં કોવિડ-19નો છેલ્લો કેસ ઓક્ટોબર 2024માં નોંધાયો હતો, જે દરમિયાન રાજ્યમાં 73 લોકો વાયરસથી સંક્રમિત થયા હતા. તેમણે જણાવ્યું હતું કે દર્દીઓની સારવાર આઈઝોલ નજીક ફાળકોનમાં ઝોરામ મેડિકલ કોલેજ અને હોસ્પિટલમાં (ZMCH) કરવામાં આવી રહી છે. રાજ્યના આરોગ્ય વિભાગના ઇન્ટિગ્રેટેડ ડિસીઝ સર્વેલન્સ પ્રોગ્રામ (IDSP) એ લોકોને ગભરાવાની જરૂર નથી તેવું કહ્યું છે. IDSP એ લોકોને કોવિડ પ્રોટોકોલનું પાલન કરવાની, નિયમિતપણે હાથ ધોવાની, હેન્ડ સેનિટાઇઝરનો ઉપયોગ કરવાની અને ભીડવાળા વિસ્તારોમાં જવાથી બચવાની સલાહ આપી છે. મહારાષ્ટ્રમાં 10 હજારથી વધુ કોવિડ ટેસ્ટ મહારાષ્ટ્ર સરકારે જણાવ્યું હતું કે શનિવારે કોવિડના 68 નવા કેસ નોંધાયા છે. તેમજ, મીડિયા રિપોર્ટ્સ અનુસાર, જાન્યુઆરી 2025 થી મુંબઈમાં 411 કેસ મળી આવ્યા છે. જાન્યુઆરીથી અત્યાર સુધીમાં, રાજ્યમાં 10,324 કોવિડ-19 ટેસ્ટ કરવામાં આવ્યા હતા, જેમાં 681 કોરોના પોઝિટિવ જોવા મળ્યા હતા. અહીં જમ્મુ અને કાશ્મીરમાં ગુરુવારે કોવિડ-19 ના બે કેસ નોંધાયા હતા. બંને દર્દીઓ કેરળના રહેવાસી છે અને શ્રીનગરની સરકારી ડેન્ટલ કોલેજમાં અભ્યાસ કરે છે. ભારતમાં કોવિડ-19ના 4 નવા વેરિઅન્ટ મળી આવ્યા ભારતનાં અનેક રાજ્યોમાં નવા કોવિડ-19 કેસોમાં વધારો થવા વચ્ચે દેશમાં ચાર નવા પ્રકારો મળ્યા છે. ICMRના ડિરેક્ટર ડૉ. રાજીવ બહલે જણાવ્યું હતું કે દક્ષિણ અને પશ્ચિમ ભારતમાંથી ક્રમબદ્ધ કરાયેલા વેરિયન્ટ LF.7, XFG, JN.1 અને NB.1.8.1 શ્રેણીના છે. અન્ય સ્થળોએથી સેમ્પલ લેવામાં આવી રહ્યાં છે અને સિક્વન્સિંગ કરવામાં આવી રહ્યું છે, જેથી નવા વેરિયન્ટ શોધી શકાય. આ કેસ બહુ ગંભીર નથી અને લોકોએ ચિંતા ન કરવી જોઈએ, ફક્ત સાવધાન રહેવું જોઈએ, જોકે WHOએ આને ચિંતાજનક ગણ્યું નથી, પરંતુ એને દેખરેખ હેઠળના વેરિયન્ટ તરીકે વર્ગીકૃત કર્યા છે. ચીન સહિત અન્ય એશિયન દેશોમાં કોવિડના વધતા જતા કેસોમાં આ જ વેરિયન્ટ જોવા મળી રહ્યો છે, જોકે A435S, V445H, અને T478I જેવા NB.1.8.1 ના સ્પાઇક પ્રોટીન મ્યુટેશન અન્ય વેરિયન્ટ કરતાં વધુ ઝડપથી ફેલાય છે. કોવિડ સામે વિકસિત રોગપ્રતિકારક શક્તિ પણ તેના પર અસર કરતી નથી. કોવિડનો JN.1 વેરિયન્ટ ભારતમાં સૌથી સામાન્ય છે. પરીક્ષણ દરમિયાન અડધાથી વધુ સેમ્પલમાં આ વેરિયન્ટ જોવા મળે છે. આ પછી BA.2 (26 ટકા) અને ઓમિક્રોન સબલાઇનેજ (20 ટકા) વેરિયન્ટના કેસ પણ જોવા મળે છે. JN.1 પ્રકાર રોગપ્રતિકારક શક્તિને નબળી પાડે છે JN.1એ ઓમિક્રોનના BA2.86નો એક સ્ટ્રેન છે. એ પહેલીવાર ઓગસ્ટ 2023માં જોવા મળ્યો હતો. ડિસેમ્બર 2023માં, WHOએ તેને 'વેરિયન્ટ એફ ઇન્ટરેસ્ટ' જાહેર કર્યો. એમાં લગભગ 30 મ્યુટેશન્સ છે, જે રોગપ્રતિકારક શક્તિને નબળી પાડે છે. અમેરિકાની જોન્સ હોપકિન્સ યુનિવર્સિટી અનુસાર, JN.1 અન્ય વેરિયન્ટ કરતાં વધુ સરળતાથી ફેલાય છે, પરંતુ એ બહુ ગંભીર નથી. એ વિશ્વના ઘણા ભાગોમાં સૌથી સામાન્ય વેરિયન્ટ છે. JN.1 વેરિયન્ટનાં લક્ષણો થોડા દિવસોથી અઠવાડિયાં સુધી રહી શકે છે. જો તમારાં લક્ષણો લાંબાં સમય સુધી રહે છે, તો તમને લાંબા સમય સુધી કોવિડ હોઈ શકે છે. આ એક એવી સ્થિતિ છે, જેમાં કોવિડ-19નાં કેટલાંક લક્ષણો સ્વસ્થ થયા પછી પણ બની રહે છે. ​​​​​​